Yera l’añu 2006 cuando entamaron les movilizaciones contra’l dragáu de la Ría de Villaviciosa . La razón pa facer esta obra yera «por motivos de seguridá» segun el xefe de salvamentu marítimu del conceyu de Villaviciosa , pero les coses cambien segun de que llau te pongas, y segun la federacion asturiana de surf la razon yera bien distinta : la construcción n’El Puntal d’un puertu deportivu con más de 500 amarres pa 2008 y, por eso, había qu’aumentar el caláu pa facer afayadizu’l tráficu marítimu na Ría.
N’esi mesmu añu , Vicente Alvarez Areces , nuna visita’l conceyu de Villaviciosa , promete reformes importantes nel arenal de Rodiles como aparcaderos nuevos, vestuarios pa los surfistes. Pero n’esto non quedava l’asuntu , el xefe del executivu autonomicu anunciaba polo baxu un proyectu d’ampliación del puertu del Puntal.
Nel añu 2007, baxo’l lema «En Rodiles cabemos toos, nun sobra naide», siguen les movilizaciones y protestes de surfistes y ecoloxistes (Asturies Verde), apoyaos pola Plataforma vecinal de Samartín del Mar. El futuru de Rodiles taba bien escuru…
Anguaño esti espaciu disfruta de les midíes de protección que-y dan la so declaración como Reserva Natural Parcial , amas , la fola de Rodiles (que se nutre precisamente del baxu de sable que quieren dragar), según la xente del mundu del surf, ye la meyor del Cantábricu y ta considerada una de les meyores d’Europa. Ye única. Anualmente cientos de surfistes de tol mundu (Francia, Australia, EE UU…) visiten el nuestru país pa gozala con esti regalu de la naturaleza. «La perda d’esta fola fadría un gran dañu al mundu del surfing asturianu, a los sos deportistes, a tiendes, escueles, campamentos», según declaraciones de la propia Federación de Surf del Principáu d’Asturies.
Asoleyao de Les Noticies
Álvaro Cueto
